व्यापारी अपहरण गरी गणेश लामाले ४० लाखको कागज बनाए
गुन्डा नाइके गणेश लामाले एक व्यवसायीलाई अपहरण गरी ४० लाख रुपैयाँको कागज गराएका छन् । प्रहरीले उनका एक सहयोगीलाई पक्राउ गरेको छ । महानगरीय प्रहरी परिसरले लामाका सहयोगी विक्रमजित लामालाई पक्राउ गरेको छ । नाइके लामा भने भागेर विदेश पुगेका छन् ।
ललितपुर प्रहरी परिसरका प्रमुख एसएसपी पीताम्बर अधिकारीले सो अपहरणमा केही व्यक्तिलाई पक्राउ गर्न बाँकी रहेको र अनुसन्धान भइरहेको बताए । पीडित व्यवसायीले करिब १५ दिनअघि गुन्डा नाइके लामासहित तीनजनाविरुद्ध ललितपुर परिसरमा जाहेरी दिएका थिए । ललितपुर प्रहरीले लामाका सहयोगी विक्रमजितलाई सोमबार पक्राउ गरी मंगलबार अपहरण मुद्दामा अदालतमा म्याद थप गरेको छ । नाइके गणेश लामासहित अरू एकजना फरार रहेको एक प्रहरी अधिकारीले बताए । ‘अनुसन्धान गर्दा लामा सिंगापुरमा रहेको खुलेको छ,’ ललितपुर प्रहरी स्रोत भन्छ, ‘जाहेरी परेको थाहा पाएलगत्तै उनी भागेका रहेछन् ।’
अपहरण गर्दा लामाले आफैँ गाडी चलाएकोसमेत पीडितले बताएका छन् । डन घैँटेको इन्काउन्टरसँगै प्रहरी गुन्डागर्दीविरुद्ध थप आक्रामक रूपमा प्रस्तुत भएपछि गुन्डागर्दीमा संलग्नहरू विदेश भागिसकेका छन् । घैँटेको इन्काउन्टरपछि लामाले आफूहरू सुध्रिसकेको भन्दै अन्तर्वार्ता दिएका थिए । तर, बाहिरी रूपमा सुध्रिएको देखिए पनि गुन्डाका नाइकेहरू भित्री रूपमा भने नसुध्रिएको प्रहरी अधिकारीहरू बताउँछन् । राजनीतिक आवरणमा उनीहरूले धम्क्याउने र पैसा असुली जारी राखेको प्रहरीको भनाइ छ । गुन्डाविरुद्ध उजुरी जारी रहेको र अप्रेसन पनि जारी रहेको महानगरीय अपराध महाशाखाका प्रमुख एसएसपी सर्वेन्द्र खनाल बताउँछन् । घैँटे इन्काउन्टर घटनापछि गुन्डाहरूविरुद्ध उजुरी दिने क्रम बढेको उनी बताउँछन् ।
गत ३ भदौमा प्रहरीसँगको मुठभेडमा कुमार घैँटे कपुरधारास्थित आफ्नै घरअगाडि मारिएका थिए । गत वर्ष प्रहरी इन्काउन्टरमा मारिएका डन दिनेश अधिकारी ‘चरी’का सहयोगी पञ्चे लामाले केही दिनअघि अदालतमा आत्मसमर्पण गरेका थिए । उनी पुर्पक्षका लागि जेल चलान भइसकेका छन् । अपराध महाशाखाले गुन्डागर्दीमा संलग्न सबैको गतिविधि निगरानी गरिरहेको आजको नयाँ पत्रिका दैनिकमा समाचार छ ।
भिडियोको लागि तल क्लिक गर्नुहोस् :
0 comments
Write Down Your Responses