मधेशी मोर्चाको आन्दोलन जनताले कहिलेसम्म थेग्ने ?
मधेशी मोर्चाले गरेको आमहड्ताल आज ७२ दिन र नाकाबन्दीको ३१ दिन पुगेको छ । आन्द्योलनरत मधेशी दलका नेता कार्यकर्ताले वीरगन्ज रक्सौल नाकाको दशगजा क्षेत्रमा पर्ने मितेरीपुलमा आज पनि धर्ना दिएर नाका ठप्प पारेका छन् । धर्ना कार्यक्रममा पर्सा र बाराका ग्रामण क्षेत्रबाट आज पनि मानव सागर आन्दोलनमा सहभागी भएका छन् । वीरगन्जमा जारी आन्दोलनमा मधेसी जनताको स्वस्फुर्त सहभागिता दिन प्रति दिन बढदै गएको छ ।
पर्सा र बाराका ग्रामीण क्षेत्रबाट दिनहु ठूलो संख्यामा स्थानीयवासीहरु मितेरी पुलको धर्नामा सहभागी हुने गरेका छन् । गाँउ गाँउबाट आज पटेल समुदायका मानिसहरु ट्याक्टर र मोटरसाईकलमा बाजागाजा सहित धर्नाम नाकामा रहेको मीतेरी पुलमा पुगेका छन् । नाकाबन्दी गर्न आन्दोलनकारीहरु चौविसै घण्टा मितेरी पुलमा बस्ने गरेका छन् । यस्तै विभिन्न संघ संगठनले पनि दिनहु मधेस आन्दोलनमा ऐक्यबद्धता तथा समर्थन सहितको जुलुश निकाल्दै आएका छन् ।यसैबिच नेपालको मुख्य भन्सार नाका बीरगन्जमा ३१ दिन देखि मधेशी मोर्चाले धर्ना दिएर नाका ठप्प पारेका कारण भारतबाट कुनै पनि मालसामान भित्रिन पाएको छैन । नाकाबन्दीमा साइकल, मोटरसाईकल तथा पैदल हिड्ने सर्वसाधारणलाई दैनिक उपभोग्य बस्तु किनमेलमा नाकामा धर्ना बसेका आन्दोलनकारीहरुले रोक नलगाए पनि ठूला मालबाहक गाडीहरु भने नाकामै रोकिएका छन् । बन्दहड्तालका कारण वीरगन्जका शिक्षण संस्था, कलकारखाना र यातायात सबै दुइ महिना देखि ठप्प रहेको छ ।
बन्द हडताल र नाकाबन्दीका कारण सीमा पारी भारतबाट मालसामानको आयात ठप्प भएपछि वीरगन्जमा इन्धन लगायत दैनिक उपभोग्य वस्तुमा व्यपारीहरुले खुलेआम कालोबजारी गरिरहेका छन् । वीरगन्जमा सबै भन्दा बढि खाना पकाउने एलपी ग्याँसको अभाव भएको छ । वीरगन्जमा सबै कम्पनीका एलपी ग्याँसका डिलरहरु बन्द छन् ।
यस्तै रक्सौलबाटै ल्याइएको पेट्रोल मिनरल वाटरको बोत्तलमा राखेर चर्को मुल्यमा विक्रि वितरण भइरहेको छ । एक लिटर पेट्रोल दुइ सय रुपैयामा खरिद गर्न बाध्य भएको उपभोक्ताहरुले बताएका छन् । दाल , चामल , चिनी , तेल जस्ता दैनिक उपभोग्य सामानमा पनि व्यपारीहरुले कालोबजारी गरिरहेपनि स्थानीय प्रशासन र सम्बन्धित निकायले कुनै वास्ता गरेको छैन । हरेक वर्षको दशैं तिहारका बेला स्थानीय प्रशासनले बजारको अनुगमन गर्दै आएको भएपनि यसपालीको दशैंमा वीरगन्जमा राज्यका तर्फबाट बजार र पसलहरुमा कुनै अनुगमन भएको छैन ।
- nepaliheadlines.com
0 comments
Write Down Your Responses