चीनका पूर्वराजदुत टंक कार्की भन्छन्, ‘इन्धन सहयोग गर्न चीन तयार भइसक्यो, हामी किन ढिला ?’
चीनका लागि पूर्व नेपाली राजदुत टंक कार्कीले तेल व्यापारमा अब भारतको भर पर्न नहुने र भरपर्दो मित्रराष्ट्र चीनसँग कारोबार थाल्नुपर्ने बताएका छन् ।
नेप्लिज समाचारसँगको कुराकानीमा पूर्वराजदुत कार्कीले भारतले तेल दिन छाडेर नेपालीहरुलाई घाँटी न्याक्ने काम गरेको भन्दै अब पनि विकल्प नसोचे झन् ठूलो हाहाकार मच्चिने दाबी गरे । ‘तेल, ग्यास, पेट्रोल, नुनजस्ता अत्यावश्यक सामानको भर एउटै देशसँग पर्नु नै हाम्रो गल्ती हो, यस्तो व्यापारको पहिल्यैदेखि विकल्प सोचेको भए अहिले यो समस्या नै आउँदैनथ्यो ।’ उनले भने, ‘सरकारले पनि इमान्दारपूर्वक भारतले काम गर्छ भन्ने सोचेको थियो होला, अब विश्वास भएन, त्यसैले सिरियसली सोच्नुपर्छ ।’भारतले आधिकारिकरुपमा आफूले नाकाबन्दी नलगाएको दाबी गर्ने गरेको र तेल पनि नदिने काम गरेर दुनियाँलाई मूर्ख बनाएको उनले बताए । उसले अहिले नाकाबन्दी गर्नुपर्ने कुनै कारण र तर्क नरहेको कार्कीको दाबी छ । ‘न दुई देशबीचको सन्धिसम्झौता, न अन्तर्राष्ट्रिय कानुन र अभिसन्धीहरुले यो कार्यको सपोर्ट गर्छ, त्यसैले कतैबाट पनि जस्टिफाइ नहुने यो काम तर्कसंगत छैन ।’ कार्की भन्छन्, ‘चीनसँग सम्झौता गरेर तत्काल पेट्रोल झिकाउने काम गर्नुपर्छ, उजस्तो शक्तिशाली र असल छिमेकीले मद्दत गर्न तयार रहेको मैले पाएको छु ।’
सस्तो महंगो भन्ने कुरा जे होस्, सरकारले अनुदान दिएर भएपनि चीनसँग दिर्घकालीनरुपमा तेल व्यापार गर्नुपर्ने डिल थाल्नुपर्ने उनको धारणा छ ।
0 comments
Write Down Your Responses