samachar » भारतले कांग्रेस पार्टी चलाउन थालेको गगन थापाको दावी

काठमाडौं, २३ असोज,
रातारात निर्णय बदलेर सोझा सुशिल कोइरालाले पार्टीभित्रको तीब्र असन्तुष्टिका बीच प्रधानमन्त्रीको उम्मेदवारी दर्ता गराएपछि कांग्रेसमा भुइचालो गएको छ । त्यससँगै कांग्रेस पार्टी कसले चलाउँछ भन्ने प्रश्न पनि उब्जिएको छ । यसैबीचमा नेपाली कांग्रेसका युवा नेता गगन थापाले आफ्नो पार्टी भारतले चलाउने गरेको दावी गरेका छन् ।

युवाहरुका माझ लोकप्रियता हासिल गर्दै गएका नेता गगन थापाले पार्टी सभापति सुशिल कोइरालाले एकाएक प्रधानमन्त्रीका लागि फेरि उम्मेदवारी दिने निर्णय गरेसँगै क्रुद्ध बनेका छन् । उनले कोइरालाले फेरि प्रधानमन्त्री पदमा उम्मेदवारी दिने निर्णय पार्टी र देशकै लागि घातक हुने बताएका छन् ।

नेता थापाले आफ्नो पार्टीलाई भारतले चलाउन थालेको बताउँदै यसरी विदेशी शक्तिमा लम्पसार नपर्न आग्रह पनि गरेका छन् । उनले भारतको इशारामा पार्टी नेतृत्व चलेको आरोप अहिले आएर साँचो ठहर्ने गरी सभापति कोइरालाले प्रधानमन्त्रीको उम्मेदवार बन्ने निर्णय गरेको बताएका छन् ।

उनले सुशिल कोइरालाले प्रधानमन्त्री पदमा फेरि जित्ने संख्या पनि नभएको र प्रधानमन्त्री बन्ने एजेण्डा पनि नभएको दावी समेत गरेका छन् । आफ्नै पार्टीका बहुसंख्यक केन्द्रीय सदस्य उनको उम्मेदवारीको विरोधमा रहेको बताउँदै थापाले यसका बाबजुत पनि कोइरालाले यो निर्णय कसरी लिए भन्ने आश्चर्य पनि व्यक्त गरेका छन् । थापाले आफू अरुको इशारामा चल्ने पार्टीभित्र रहेको बल्ल थाहा भएको समेत बताएका छन् ।

थापाले मधेसका जायज माग सम्बोधन गर्नुपर्ने र ती मुद्दा राखेर एमालेलाई सरकारको नेतृत्व दिन पार्टीले सघाउनुपर्ने तर्क राख्दै आएका थिए ।


रातारात कोइराला बदलिए 

कांग्रेस सभापति तथा प्रधानमन्त्री सुशिल कोइराला शुक्रबारसम्म प्रधानमन्त्री बन्ने कुनै सोेचमा थिएनन् । पार्टी भित्रका केही नेताले कांग्रेसले नै सरकारको नेतृत्व लिनुपर्ने कुरा उठाएका बेला त्यसको प्रतिवाद समेत कोइरालाले गर्ने गरेका थिए । उनले आफू राष्ट्रपति पनि नबन्ने र प्रधानमन्त्री पनि नबन्ने पार्टीको बैठकमा स्पष्ट राखेका थिए । शुक्रबार साँझसम्म यही अडानमा रहेका कोइराला शनिवार बिहान आइपुग्दा एकाएक बदलिएको कांग्रेसकै नेताहरु बताउँछन् । शनिवार बिहान पार्टीका पदाधिकारीहरुलाई बोलाएर कोइरालाले आफू प्रधानमन्त्रीको उम्मेदवार बन्ने निर्णय सुनाएका थिए । उक्त बैठकमा महामन्त्री कृष्ण सिटौला, सहमहामन्त्री पूर्णबहादुर खड्कालगायतका नेताले कोइरालालाई सम्झाउने अनेकौ प्रयास पनि गरेका थिए । दलहरुबीचको एकता कायम राख्नका लागि कांग्रेसले उम्मेदवारी दिन नहुने बताउँदै नेताहरुले कोइरालालाई यदि १६ बुँदे सहमति विपरित गए देश ठूलो दुर्घटनामा पर्ने चेतावनी पनि दिएका थिए । बैठकमा केही नेताहरु कोइरालाको त्यो चट्टानी अडान देखेर आक्रोशित भएका थिए भने केही नेताहरु सम्झाउँदा सम्झाउँदा नमानेपछि रोएका थिए । थर्काउने र रुने सबै गर्दा पनि कोइराला गल्दै गलेनन । कोइरालालाई मनाउने सबै प्रयासहरु असफल भए ।

युवा नेता थापा कोइरालाले केही दिन अघिसम्म सार्वजनिक रुपमै फेरि प्रधानमन्त्री नबन्ने घोषणा गरेको स्मरण गर्दै शनिवार एकाएक उम्मेदवारी दिने निर्णयप्रति आश्चर्य व्यक्त गर्छन । कांग्रेसभित्र प्रधानमन्त्रीको उम्मेदवार बन्न बरिष्ठ नेता शेरबहादुर देउवा र उपसभापति रामचन्द्र पौडेल बरु आकांक्षी थिए । तर, अन्तिममा त्यो सबै दृष्य उल्टियो ।

स्रोतका अनुसार कोइरालालाई भारतले भित्रभित्रै उचालेको छ । उनलाई सबै अस्त्र प्रयोग गरेर फेरि पनि प्रधानमन्त्रीमा जिताइदिने आश्वासन समेत दिइएको स्रोतको दावी छ । काेइरालालार्इ ठूलाे अार्थिक सहयाेग पनि अज्ञात शक्तिबाट भएकाे स्राेतले दावी गरेकाे छ ।

1 comments

Write Down Your Responses