केपी ओली प्रधानमन्त्री भएपछि भारतीय राजदुत राय र माथुर कारवाहीमा
काठमाडौं, २५ असोज । नेपालको संविधानमा भारतको राजनीतिक अभिष्ट पुरा गराउन नसकेको अभियोगमा नेपाल स्थित भारतीय राजदुत रंजित राय कारवाहीका परेका छन् ।
कारवाही स्वरुप राजदुत रायलाई फिर्ता बोलाउने निर्णय भारतले गरेको स्रोतले बताएको छ । आन्दोलनमा रहेका मधेसबादी दलहरुका माग सम्बोधन गराउन राजदुत रायले धेरै प्रयास गरेका थिए । त्यसैगरी पछिल्लो पटक प्रमुख तीन दलको गठबन्धनलाई तोड्न सफल भएपनि भारत पक्षधरलाई जिताउन नसकेपछि राय कारवाहीमा परेका हुन् ।
प्रधानमन्त्रीमा एमाले अध्यक्ष केपी ओली निर्वाचित भएपछि भारतको विदेश मन्त्रालयले आफ्नो कुटनीतिक प्रयास असफल भएको ठहर गरेको छ । असफल कुटनीतिक प्रयास गरेको भन्दै राय लगाएत भारतीय जासुसी संस्था ‘र’ का पूर्व प्रमुख अबदेश विहारी माथुरलाई पनि कारवाही हुन सक्ने आशंका गरिएको छ ।
३ असोजमा संविधान जारी भएलगतै नेपाल आएका माथुर अझै नेपालमै छन् । दिनरात प्रयास गरेर तीन दलिय गठबन्धनबाट नेपाली कांग्रेसलाई अगल गराएपनि सफलता पाउन सकेनन् । कांग्रेसलाई तीन दलको गठबन्धनबाट अलग गराएपछि कांग्रेसका सहमहामन्त्री पूर्णबहादुर खड्काले पार्टीभित्र पश्चिमी बायुको प्रभाव परेको भन्दै पदबाट राजीनामा समेत दिएका थिए ।
राजदुत राय ओली निवासमा
नवनिर्वाचित प्रधानमन्त्री ओलीलाई भारत भ्रमणको औपचारिक निम्तो दिन भारतीय राजदुत राय ओली निवास बालकोट पुगेका छन् । सोमबार विहान ओलीलाई बधाई दिन र भारत भ्रमणको औपचारिक निम्तो राजदुत रे ओली निवास पुगेका हुन् ।
0 comments
Write Down Your Responses